AGTERGROND
Gert Bekker is gebore en getoë in Brits. As jong 5-jarige het sy ma sy liefde vir musiek gestimuleer deur 'n blokfluit in sy hande te druk, vertel Gert. Op laerskool het hy oorgeskakel na viool en ook later na tjello. Op hoerskool dink 'n seun mos anders, sê hy skertsend. Dit was baie lekkerder om met 'n kitaar tussen skoolvriende en by skoolkonserte almal te vermaak.

Die hartseer en leed van die lewe het hom op 'n jong ouderdom getref. Sy ma is oorlede toe hy as 15-jarige uitruilstudent in Duitsland skool gegaan het. Sy pa is 18 maande later aan 'n hartaanval oorlede en hy, sy jonger broer en sussie het by sy ma se sus in Port Elizabeth gaan woon. Gert was baie betrokke by die kulturele aktiwiteite en was so te sê dadelik opgeneem in die baie gewilde Framesby Hoërskool koor. Hy en 3 skoolvriende het ook 'n akapella - kwartet gevorm en op verskeie geleenthede by die skool en kunswedstryde opgetree. Gert matrikuleer in 1989 aan die Hoërskool Framesby en vat die pad terug Transvaal toe om sy 1 jaar weermagopleiding te ontvang. Na weermag gaan maak Gert weer 'n draai in Europa vir so 3 maande lank en keer inderhaas terug na sy meisie wat hy in Suid-Afrika agtergelaat het. Hulle liefde het die toets van die tyd deurstaan en 'n jaar later raak hulle verloof om op 30 Januarie, 1993 in Pretoria te trou.

Gert het sy kitaar nooit heeltemal neergesit nie maar begin weer met nuwe ywer te sing in 1993 toe hy lid word van die akapellagroep - Die Holy Boys. Die groep van sewe jong ouens het vir sowat 3 jaar lank in Pretoria - omgewing opgetree.

   
 

Gert moes egter sy eie ding begin doen toe die jongklomp in alle rigtings uitmekaar begin spat.

1995 was die begin van baie groot dinge vir Gert, ondermeer het hy pa geword, sy eie besigheid begin en sy eerste kamerkonsert aangebied in Pretoria. Die repartorium was maar meestal Koos du Plessis en so een of twee van sy eie liedjies. Cat Stevens en Don McLean was ook 'n invloed, maar Gert se groot liefde het toe al by Afrikaans gelê.

In 1997 lewer hy 'n baie suksesvolle 3-aande vertoning, getiteld "Herinneringe aan Koos du Plessis" in die destydse 'Teaterhuisie' van Carel Tichardt in Sunnyside, Pretoria. Karla du Plessis het, sonder dat hy vooraf daarvan geweet het, ook na een vertoning kom kyk en het na die vertoning na hom toe aangestap gekom en gesê: 'Dis die mooiste wat ek iemand nog my pa se goed hoor sing het!'

Gert het maar so elke 3 tot 4 maande 'n konsert iewers gehou tot in 2001 toe hy skielik weens 'n rugbybesering nie meer die aflewerings van sy voerebesigheid kon behartig nie. Hy het noodgedwonge iemand aangestel en sit toe skielik met hope tyd om te spandeer aan sy eintlike groot liefde, musiek.

Sedertdien het Gert talle nuwe liedjies geskryf en tree hy 4 keer per week by vaste gigs in Pretoria en Cullinan op. Sy eerste CD het ook Desember, 2003 die lig gesien en hy het reeds meer as 1300 CD's by sy vertonings verkoop

Gert is vinnig besig om in die Afrikaanse musiekliefhebbers se harte in te kruip met sy unieke styl van eenvoudige, dog diep liriekgerigte musiek!

Hierdie kunstenaar is passievol oor sy musiek, taal en mede-homosapiens en nooi jou uit na hierdie eiesoortige aanbieding van klank, taal en emosie wat in Afrikaans, Hollands, Frans en Engels aangebied word!

 

  
   
 

>> www.bitmatrix.co.za