|
Soms gebeur dit dat van die mooiste
musiek in enige land en taal nooit kommersiële
blootstelling kry nie. Óf die skrywer daarvan is
onbekend aan die breë publiek, of dit verdwyn tussen die
massas ander kommersiële vrystellings.
Met die samestelling van hierdie CD het uitvoerende
vervaardiger Albert du Plessis, musiekale regisseur
Mauritz Lotz en Gert Bekker besluit om sulke juwele uit
die skatkis van ligte rock en kabaret te gaan opsoek en
met vars en toeganklike musiekale verwerkings aan te
bied. 'n Breë verwysingsraamwerk is gebruik. Taal is
byvoorbeeld geen grens nie en Gert Bekker sing ewe
gemaklik in Afrikaans, Frans en Flaams.
Die openingsnit, "Miere", is 'n toeganklike moderne pop
nommer, meesterlik geproduseer deur Mauritz Lotz, wat al
die musiekale verwerkings vir die CD gedoen het. Snit
nommer 3, "Girl", is weer 'n ligte rock nommer met 'n
verslawende refrein, geskryf deur Myburgh Grobbelaar
nadat sy verloofde hom in die openbaar en op TV afgesê
het terwyl sy haar tyd uitgesit het in die "Big Brother"
huis. Gert Bekker se eie komposisie "Vrou so na my Hart"
(snit no. 2), word reeds op RSG se speellys gehoor.
Gert Bekker het die afgelope paar jaar veral in
restaurante en klein teaters in die Pretoria omgewing
bekend geword vir sy veelsydige eenman vertonings.
Hierdie is Gert Bekker se eerste kommersiële vrystelling.
Gert werk op die CD en op die verhoog saam met van Suid
Afrika se top musiekante. Mauritz Lotz is
musiekregisseur, Denny Lalouette op baskitaar, Bruce
Wallace op dromme en Jaconel Vey op klawers. |
|
